Sistema digitalen oinarrizko kontzeptu eta diseinu-teknikak aurkezten dira liburu honetan. Liburuan zehar jorratutako gaiak ulertzeko behar diren kontzeptu guztiak bertan azaltzen dira, gai honi buruz ezer ez dakien irakurlearengan pentsatuz idatzi baita. Halere, egiten den bidea luzea da: oinarrizko kontzeptuetatik hasten da liburua, behe-mailako osagai digitalak aurkeztuz, eta bukaeran, berriz prozesadore bat —edozein konputagailuren muina— nola diseina daitekeen azaltzen da, horretarako adibide jakin bat azalduz. Tartean, osagai eta kontzeptu berri asko azaltzen dira. Liburua erabilgarria izan dadin eta gaia ongi ulertzeko, kapitulu bakoitzean, kontzeptuak azaldu eta gero, zenbait ariketa ebazten dira, xehetasun handiz, irakurleak ongi jarrai dezan ebazpena.

Hauek dira liburuan zehar azaldutako gai nagusiak: aljebra boolearra, ate logikoak, bloke konbinazionalak, bloke sekuentzial sinkronoak, memoriak, sistema digitalen diseinu-metodologia, eta prozesadore sinple baten diseinua.